Madaxweynaha Somaliland oo Daah furtay Wareejinta Nashqadaha Qorshe magaaleedyada Magaalooyinka Boorama, Laascaanood iyo Gabiley

0
Madaxweynaha Somaliland oo Daah furtay Wareejinta Nashqadaha Qorshe magaaleedyada Magaalooyinka Boorama, Laascaanood iyo Gabiley

Hargeysa (xogside) Madaxweynaha Jamhuuriyadda Somaliland, Mudane Muuse Biixi Cabdi, ayaa maanta daah-furay munaasibad ballaadhan oo loo qabtay wareejinta nashqadaha qorshe-magaaleedyada Boorama, Laascaanood iyo Gabiley oo ay soo diyaarisay wasaaradda hawlaha guud, Dhulka iyo Guryeynta Somaliland.

Munaasibaddan oo lagu qabtay xarunta qasriga  madaxtooyada, ayaa waxa madaxweynaha kala qaybgalay, madaxweyne-ku-xigeenka Jamhuuriyadda Somaliland, Mudane Cabdiraxmaan Cabdilaahi Ismaaciil (Saylici), xubno kamid ah golaha wasiirrada ahna guddida nashqadaha qorshe-magaaleedyada, xildhibaanno, gaasimeyaal guud, madax ka socotay hay’adaha kala duwan ee qaranka injineerro, madax ka socotay wasaaradda Hawlaha guud, dhulka iyo guryeynta iyo marti-sharaf kale, waxana madasha si qoto dheer diiradda loogu saaray muhiimadda ay leedahay in magaalooyinka kala duwan ee dalku ay yeeshaan qorshe cad oo fiditaankooda loo tixraaco iyo dedaalka ay wasaaraddu usoo gashay inay maanta lasoo gaadho heer la wareejiyo nashqadahaas.

Ugu horrayn, khubaro katirsan wasaaradda Hawlaha guud, Dhulka iyo Guryeynta, ayaa madasha kusoo jeediyey muuqaallo ku saabsan hannaanka casriga ah ee loo nashqadeeyey magaalooyinka Boorama, Gabiley iyo Laascaanood iyo faa’iidooyinka laga helay qorshayaasha loo diyaariyey magaalooyinkaas, kuwaas oo faa’iidooyin badan u leh bulshada halkaas ku dhaqan, noloshoodana wax badan ka taraysa.Madaxweynaha Somaliland

Agaasimaha guud ee wasaaradda Hawlaha guud, Dhulka iyo Guryeynta, Mudane Cabdilaahi Maxamed Maxamuud (Jiidhe) oo halkaas ka hadlay, ayaa si qotodheer u sharraxay dedaalkii ay wasaarad ahaan usoo galeen sidii ay hawshani u hirgeli lahayd, islamarkaana magaalooyinka Boorama, Gabiley iyo Laascaanood haatan gacanta ku haystaan nashqadihii ay raaci lahaayeen ee ay u nidaamin lahaayeen magaalooyinkooda.

Badhasaabka gobolka Sool, Mudane Cabdikariin Aadan Xaaji Diiriye, maayarka Caasimadda Hargeysa, Mudane Cabdikariin Axmed Mooge, Maayarka Boorama, Mudane Maxamed Axmed Barasho, Laascaanood, Mudane Cabdiraxiim Cali Ismaaciil, maayarka Gabiley, Mudane Maxamed Ammiin Cumar Cabdi oo madasha hadallo ka jeediyey, ayaa soo dhaweeyey qorshaha iyo nashqadaha cusub ee loo sameeyey magaalooyinka Boorama, Laascaanood iyo Gabiley, iyaga oo guul ku tilmaamay tallaabadaas ay wasaaradda Hawlaha guud, Dhulka iyo Guryeyntu qaadday.Madaxweynaha Somaliland

Guddoomiyaha guddida hawlaha guud ee golaha wakiillada Xildhibaan Xirsi Cabdilaahi Xirsi, Eng. Maxamuud Geeddi oo aqoon durugsan u leh nashqadaynta magaalooyinka iyo xubno khubaro ah oo ka socday wasaaradda Hawlaha guud, Dhulka iyo Guryeynta, ayaa iyaguna qorshe-magaaleedyada cusub ee la sameeyey ku tilmaamay tallaabo guud ahaanba guul u ah qaranka Jamhuuriyadda Somaliland, islamarkaana kor u qaadaysa quruxda iyo haybadda magaalooyinka Boorama, Gabiley iyo Laascaanood.

Wasiirrada wasaaradaha Arrimaha Gudaha, Mudane Maxamed Kaahin Axmed, Dhallinyarada iyo Ciyaaraha, Mudane Cabdirashiid Ducaale Qambi oo munaasibadda hadallo kooban ka jeediyey, ayaa wasaaradda Hawlaha Guud, Dhulka iyo Guryeynta ku bogaadiyey nashqadda iyo nidaamka cusub ee ay u samaysay magaalooyinka Boorama, Gabiley iyo Laascaanood, waxana ay soo jeediyeen in magaalooyinka  kale ee dalkana u sameeyaan nashqad iyo nidaamin cusub.Madaxweynaha Somaliland

Wasiirka wasaaradda Hawlaha Guud, Dhulka iyo Guryeynta, Mudane Cabdilaahi Abokor Cismaan, ayaa sharraxaad dheer ka bixiyey hawsha culus ee ay ku daah-furayaan nashqadaynta iyo nidaaminta magaalooyinka Boorama, Gabiley iyo Laascaanood, waxana uu hoosta ka xarriiqay inay dedaal badan, waqti, maal iyo maskaxba geliyeen sidii ay magaalooyinkaasi qorshe qurux badan oo mustaqbalka anfaca u heli lahaayeen, taasina ay kamid tahay siyaasadda uu madaxweynaha qaranku dalka ku hoggaaminayo.

Madaxweynaha Jamhuuriyadda Somaliland, Mudane Muuse Biixi Cabdi oo munaasibadda si rasmi ah u daah-furay, ayaa soo dhaweeyey horumarka ay ku tallaabsatay wasaaradda Hawlaha guud, Dhulka iyo Guryeyntu, waxana uu u mahadnaqay cid kasta oo hawshaas quruxda badan ee lagu nashqadeeyey magaalooyinka Boorama, Gabiley iyo Laascaanood gacan ka geysatay, waxana isaga oo arrimahaas ka hadlaya uu yidhi, “Waxan u mahadnaqayaa wasaaradda hawlaha guud iyo injineerrada, waxa kale oo aan u mahadnaqayaa ciddii arrintan ka qaybgashay oo dhan iyo macallimiintii inoo soo saartay dhallinyarada waxaas quruxda badan sameeyey, waxana inoo ballan ah inaynu magaalooyinkeenna oo dhan u samayno nashqad (Master plan).”

Ugu dambayntii, madaxweynaha Jamhuuriyadda Somaliland, Mudane Muuse Biixi Cabdi waxa uu nashqadihii qorshe-magaaleedyada ee ay wasaaradda Hawlaha guud, Dhulka iyo Guryeynta diyaarisay ku wareejisay maayarrada  magaalooyinka Boorama, Gabiley iyo Laascaanood, si ay ugu hawlaan.

Madaxweynaha Somaliland oo Daah furtay Wareejinta Nashqadaha Qorshe magaaleedyada Magaalooyinka Boorama, Laascaanood iyo Gabiley

war celin